Repost: 藍絲帶成日話簽名既人多過佔中幾多幾多,
又話呢D先係真正代表民意,
我想講,

搞個簽名運動實多人過集會既示威者架,
周圍都係街站,花少少時間簽個名有幾難姐,
專門搵埋D公公婆婆,簽完名有米派,
又唔需要任何身份證明,簽完兜個圈再簽都得架啦,
仲有都唔知會唔會有人逐一去唔同既街站簽名,
計出黎條數一定大架.
但請問咁樣既簽名運動有幾大公信力?

我唔係要反對或者阻止呢D簽名運動,
而我只係覺得如果你地咁把炮既,
點解唔發起無限期集體靜坐去抗議黃絲帶既「所作所為」?
我比你係公園足球場靜坐又點話?
但我唔係要你坐一日半日,而係要長期喎.
藍絲帶你地撫心自問做到既又有幾多人?

唔該唔好淨係識得話人搗亂,
一味淨係不斷放大果小部分示威者既惡行,
大部分示威者和平抗爭就睇唔到?
人間有情既畫面就睇唔到?
你地當然睇唔到,
因為你地根本冇親身視察過,
淨係收集到一D偏頗既資訊,
比埋D厭惡性既留言又何來客觀?
如果警方唔係選擇性執法,縱容暴力,知法犯法既話,
根本就唔會有十幾萬人走出黎,
如果689肯正視我地訴求既話,
佔中更加唔會存在.
如果大家簽個名就可以令689回應訴求既話,
示威者就唔洗為抗爭不惜連日訓街啦.

唔該唔好淨係識得話人廢青,
點廢都唔及你地到今時今日都仲可以支持警察幫口講埋D廢話,
人地學生咁細個都識得乜野叫做堅持,
而做左幾十年人既你地,淨係識得開口批評,
慚愧既應該係你地.

唔該唔好淨係識得話人暴徒,
平心而論,示威者有幾暴力?
警察受傷既程度有幾嚴重?
而有幾多個示威者被打比頭破血流又知唔知?
警察有警棍,胡椒噴霧,盾牌,催淚彈,
而示威者有既最多都係遮,
原意用黎抵擋胡椒噴霧但反被指為係攻擊性武器,諷唔諷刺?
如果示威者真係有心攻擊警察既,就唔會用遮啦~係咪?
相反,警棍扑爆人地個頭就唔叫暴力?
反佔中人士持有利器既清場行動就唔叫暴力?
黑勢力見人就打既行為就唔叫暴力?
係咪仲要認為示威者拎住把遮就係最暴力既果一班?

唔該唔好淨係識得話人違法,
唔通你就一次都未試過紅燈過馬路,非法下載,用翻版?
你有咩資格話人地違法?
唔該唔好自打嘴巴,唔好有口話人冇口話自己,
難道警察反佔中黑勢力就冇違法?
心照啦.

點解開口埋口淨係識得針對示威者黎講?
做左幾十年人既你地,淨係識得選擇性批評,
你地認為自己好得過比你地年輕既一輩好多咩?

藍絲帶人士,
你地唔認同我地既立場唔緊要,
我亦都理解佔中影響到大家日常生活,
但希望你地明白黃絲帶人士上街抗爭既原因.
就黎一個月,你地有冇諗過點解我地仍然要堅持唔放棄?
我地目的並唔係想香港亂,而係唔想香港被中央控制,
揀完先比你揀咁樣叫做有得揀咩?
由中央委任既特首.咁樣揀比三十個你揀都係冇分別,
對日後生活所帶黎既影響比起佔中既嚴重得多.
你地都有仔女,你地係咪想下一代接受國民教育既洗腦?

你地反佔中還反佔中,
你地究竟知唔知你地自己撐警既原則係乜野?
本身為左和平,維護法治,恢復社會秩序而支持係冇問題既,
但當警察已經成為左政治既工具,
只會聽從高層唔合理既命令,
同時夾雜左私人情緒係工作入面,
再唔係憑紀律,專業,公正,良心去執法,
我想問係咪同你地撐警既原則背道而馳左?
你地係咪仲要咁唔理性盲目咁支持警察?

黃絲帶朋友,
我地應該慶幸我地有既係公民質素,
人間有情既畫面令我好感動,
雖然大家都互不相識,
但可以見到有人會主動行埋黎問你:要唔要退熱貼啊~
又有熱心人士會買唔同既物資供大家使用,
原來香港人團結起上黎係可以咁齊心,發揮互助互愛既精神,
而呢D野,國民教育係永遠都做唔到.

By style819